- 044 -
1335 (25. lipca) Legnica, w dzień św. Jakuba Apostoła etc.
Książę Bolesław III. Rozrzutny obiecuje obywatelom Legnicy, że bez ich wiedzy nie wyda zezwolenia na bicie żadnej nowej monety.
— Wir Bolezlaw von gotes gnaden herczoge von Slens unde herre zcu Legnicz tun kunt allen den die disen brif sehn ader horin lesin, das wir geloben unsern getruen burgern czu Legnicz, daz diese muncze unde cleynen phennige, di nu sin in unsem lande zcu Legnicz, sullen gehen unde unvorrukt bliben hi zcwissen unde von ostirn dy nu nehst kumen uber ein jar, unde darnach wen wir eine nue muncze oder nuwe cleine phenninge wallen haben in unserm lande zcu Legnicz, di sulle wir lassin machen mit rate unde wissen unser burger zcu Legnicz, unde was muncze adir cleine phenninge wir vorbas me lasin slan adir machen doselbst in unserm lande zcu Legnicz, di sullen von der zeit als si usgehen zcwey gancze jar gehen unvorrukt unde bliben. Das gelobe wir unsern vorgenanten burgern zcu Legnicz stete unde gancz zcu halden, diwile wir lebin, unde zcu geczuge derselben rede gebe wir desin brif mit unser wissene vorsegilt mit unserm ingesegil.
Das ist geschen in unser stat zcu Legnicz an sente Jacobs tage des heyligen zcwelf boten noch gotis geburt thusent iar drihundert iar in dem vumphundedrissiksten iare.
Dobie sint gewest unse man her Jeske von Berndorf, her Jeske Buziwoy, Albrecht Beyr, Hannus von Jimberg, Hannus Zchirmer, Heinrich von Landiscrone unde Johannes von Schelndorf unse lantscriber, der desin brif hat gescriben.